و هى ماشية فى الشارع

تسير مسرعة كعادتها للمول التجارى

تعبر الشارع فى سرعة

تصل الى الرصيف المقابل و تكمّل طريقها مسرعة إلى باب المول

يقابلها فتى فى العاشرة من عمره ..

 يرتدى بنطلون كاكى اللون.. او هكذا صار من أثر الزمن

يرتدى كما من الملابس التى لا يمكن تحديد ملامحها او لونها يعلوها ما كان يوما بول اوفر

و يحمل مجموعة من اكياس المناديل المهترئة بدورها

طنط… و النبى يا طنط خدى منى الله يخليكى

ربنا يخليكى ربنا يخليكى…

يجرى للخلف ليساير تقدمها للامام بنفس السرعة

و النبى يا طنط…

أى حاجة…

أبوس إيدك…

ييأس

تستمر فى إسراعها

يتركها

يلحق بالسائر من خلفها:

و النبى يا عمو .. ربنا يخليك يا رب…

 

تقترب من الباب الزجاجى الضخم للمول

يتصاعد من الباب دخان الاطعمة الجاهزة المختلفة

تستطيع ان تستنشقها حتى من قبل ان تصل الى السلمتين الرخاميتين امام الباب

على السلمتين الرخاميتين

رجل فى العقد السادس من العمر..

يتشبث بذراعه ذراع ذكورى آخر..

لم تر صاحب الذراع الاخرى و لكنها ميزت انه يرتدى بذلة سوداء.. قدرت انها انيقة

يتشبث الذراع بالرجل محاولا إعادته إلى داخل المول.. بينما ينظر الرجل الخمسينى إلى الشارع مبتسما فى إحراج و رغبة فى الإسراع خارجا

يتقدم الخمسينى خطوتين متثاقلتين إلى الأمام فينزل سلمتان

يتبعه الشاب _صاحب الذراع_ فى لهفة

لم تخطئ تخميناتها

شاب عشرينى

بذلة سوداء أنيقة

قميص ناصع البياض

و كرافت أحمر زاهى…

– طب حضرتك خد فكرة..

يقولها مبتسما فى توسل

– ألف شكر يا حبيبى..

يقولها الخمسينى فى إبتسامة محبطة

– حضرتك بس إتعرف عالعرض اللى هاقدمه لسيادتك….

ابتسامة أكثر توسلا…

– آسف والله…..

و يتركه منصرفا

تدلف إلى المول تتبع الشاب المحبط.. لتراه يحاول تقديم عرض آخر لأول المارين

Advertisements
Published in: on February 7, 2007 at 11:42 pm  Leave a Comment  

ماحدش يقول لسه فى أمل

 1_637416_1_34.jpg

أوعوا حد فيكوا يفتح بقه و يقول ان لسه فى أمل

خلاص.. لا أمل و لا عمر و لا أى حد من اللى قالولنا عليه فى كتب القراءة “الرشيدة” اللى ادوهالنا بعد جرعة شلل الاطفال..

كتب القراءة اللى عمرها ما جابتلكم سيرة عن اللى بيحصل جمبكم هنا.. غير لما فاقوا و احنا فى ثانوى قالولنا ان فى حاجة مبهمة اسمها القدس.. و قالوا ان صلاح الدين حرره.. و سكتوا بعد كده…. بس بعدها غيروا المنهج و شالوا السيرة دى منه نهائى

ماحدش يقوللى ان فى امل بعد ما اسرائيل طيرت كام عصفورة فى الجو قام كله بص يشوف العصفورة

العصافير كتير

بس اكبرهم و اخيبهم العصفورة اللى راحواوراها مكة انهارده

و كل ما حجم و خيبة العصفورة تكبر.. كل ما المصيبة تكون اكبر..

بصو كده…

http://www.aljazeera.net/NR/exeres/94AE7845-54C8-45F5-BC6E-75A8958F3546.htm

http://www.aljazeera.net/NR/exeres/B0F45307-55FA-4181-9855-838D467347A1.htm

 

جديدة؟؟  أبدا..

حد اتحرك؟؟؟

…………………….

طب حد هايتحرك؟؟

…………………..

الحكام… بيبصوا عالعصورة

الشعوب… هما كمان

كل واحد بيدور عالعصافير اللى تخصه

 

 

 

خلصت خلاص

 

كلام بأه من نوعية القدس هايرجع هايرجع..

اه معاكم هايرجع ان شاء الله

بس نخلينا واخدين بالنا

مش فى زماننا ولا فى زمن عيالنا… لسه كمان

و خلينا فاكرين… احنا الجيل اللى اتحركت فيه الجرافات لهدم المسجد الأقصى و كل واحد فينا بيبص عالعصفورة

 

Published in: on February 6, 2007 at 7:47 am  Leave a Comment  

 yakhofee_05.jpg

إمبارح… كان عمرى 16

إمبارح… كان عمرى 18

إمبارح …كان عمرى 20…..

 

بالراحة شوية يا بكرة

Published in: on February 5, 2007 at 4:09 pm  Leave a Comment  

صباحكم عنّاب…

صباح الخير…

أول بوست ليّا هنا…

من غير مقدمات، هاتبقوا تعرفونى واحدة واحدة من بوستاتى إن شاء الله

دى الطريقة اللى بافضلها فى التعارف (أعرفكم و تعرفونى من يوم للتانى) و مفيش داعى لتقديم بطاقة تعارف نظرية مالهاش أساس ولا معنى

المهم.. صحيت من النوم انهارده متفائلة و عندى حالة طناش للى بيجرى حواليا مش عارفة ليه، مع ان الأمور ماجتش لقدام ولا خطوة واحدة فى اى مجال من المجالات..

يعنى التقدم قدامه ستين الف فرصة عشان يثبت نفسه فى حياتى.. بس هو لسه مش شايف ان الوقت وقته

يعنى انا صحيت متفائلة رغم ان الكمبيوتر ماتصلحش.. بل بالعكس زادت اعراض خرفه رغم ان عمره ماكملش سنتين

و رغم ان المشاكل العائلية مازالت مستعرة و مشتعلة كما لم تكن من قبل

و رغم ان الريسيفر لسه من شهرين بايظ و ماتصلحش

و رغم انى نايمة فى ليلة مايعلم بيها الا ربنا

و رغم انى لسه مالقيتش الشغل اللى انا عايزاه

و رغم انى لسه مش قادرة احقق حلمى فى انى اشتغل من البيت

و رغم حاجات كتير اوى على جميع المستويات مش بس الشخصى……….

لو حد عنده تفسير للموضوع يا ريت يرد

 اشوفكم تانى سوون

Published in: on February 4, 2007 at 12:30 pm  Leave a Comment  

Hello world!

Welcome to WordPress.com. This is your first post. Edit or delete it and start blogging!

Published in: on February 3, 2007 at 12:06 am  Comments (1)